special
科學園新 Hit踩躺車
2009年07月10日摘生果、摸蜆都比較靜態，近期網上熱門討論科學園單車徑，事關有最新 hit的「躺車」（躺式單車），加上路程唔難，適合一家大細玩，最啱假日全家人一齊出動。
躺式單車（ Recumbent bike）望落好似好兒戲，其實好處極多，經專業力學設計令騎乘者唔會感到腰、背及臀部痛，同時有修腹作用，女士聽到最開心。另一重點是有三輪款式，唔使識玩單車都玩得，大人小朋友都踩得輕鬆自在。
澳 洲 Greenspeed GT1是最大眾化躺式單車，但售價達$15,000，時租則$150，現在有家庭 package，租多一架 KMX Kid's Trike Storm總數收$200，如果一家三口出車$350可玩足一個鐘，足夠時間由科學園單車徑來回大埔海濱公園，沿途有白石角海濱長廊靚海景，假日全家影吓 相踩吓單車確唔錯。
唔好以為躺式單車好慢，踩得快時速可達 50公里，但車身夠安全穩陣，小朋友都享受到飆車快感。
單源老闆 Corbett Rowell係躺式單車發燒友，佢話這類車開始被香港家庭接受，配件仲有好多，依家假日甚至要預約先可租到車。
解構躺車
工作人員喺出車前會調節到適合你的身形長度，令踩起來更流暢。
Greenspeed GT1屬摺合式車款，但摺合後 size仍大，較難攜帶。
兩邊手控各有倒後鏡和波箱，很專業。
試後感
Kitty：「我唔識踩兩轆單車，比起平時玩開的三輪車好玩得多，瞓喺度踩好舒服，速度快但唔怕反車，我會叫媽咪再帶我嚟踩。」
Tina：「開頭玩時仍未習慣，感覺麻麻，覺得難控制，但後來踩順咗後感覺爽好多，三輪設計安全又舒服，踩好耐都冇坐到 petpet痛。」
路線：科學園至大埔海濱公園
來回時間：約一小時
風景：★★★★
難度：★（以 5★為最高）
單源
科學園 19座地下 S03
2210 5050
搵食填肚
科學園好似守衛森嚴的高科技區域，其實非租客和工作人員也可以入內參觀。踩完還車後想醫肚，可以再到 food court Fresh開餐，有中、西、東南亞等美食，價值亦實惠，仲有開揚露天茶座，食得優悠舒適。
Fresh科學園科技大道西 8號 2210 7022
菠蘿配火腿的夏威夷薄餅口味清新，最適合夏天吃。$68
消暑影相
科學園風景優美，黃金飛船是影全家福必到景點。
天時暑熱踩單車，風扇仔作用不大，最新的降溫 product是電子凍棒，無化學作用，一掂即透心涼，甚至可紓緩運動時手腳的損傷紅腫。$368（ JC Shop 3102 2783）
方便單車徑
若要玩傳統單車，可選大美督郊野公園至西沙這條單車徑，沿途有燒烤場、魚場、石灘等，踩到累時可停低 hea一陣，景色怡人。整體路段平坦，合家歡最啱踩，途中亦有公廁和士多，夠方便，只係到馬鞍山一帶時較多馬路燈位，家長緊記睇實小朋友咪衝燈。租車交車 亦方便，唔想踩足全程亦可於大美督、大埔或馬鞍山還車。
路段屬平坦易踩，小朋友都輕鬆踩得到。
西沙單車徑尾段有很多食店，踩到累醫肚好地方。
大美督、馬鞍山都有租單車店，時租$18-40，可於不同地點還車。
路線：大美督郊野公園至西沙
來回時間：約三小時
風景：★★★★★
難度：★★★
單車公園
唔想長途跋涉到郊外踩單車，市中心單車公園也是好選擇，內有專為小朋友而設的花式單車徑，唔會太難亦夠安全，小朋友玩得開心，家長亦放心。
沙田小瀝源歷奇單車場
地方夠大，內裏單車徑有很多不同花式設計，上橋落斜、高速旋轉、路障等，同時亦可玩繞圈計時比賽。場內設有小食亭，不過只於周末和假日開放。
好玩度：★★★★★
陳小朋友：「媽咪一個月會帶我嚟呢度玩幾次，有時同阿哥玩鬥快，好玩過踩平路單車徑。」
九龍城賈丙達公園單車場
設計較舊，但道路難度性較高，九曲十三彎，初學單車小朋友要有大人傍住先安全。而公園內和鄰近有租單車店舖，時租收費$15-$40，很方便。
好玩度：★★★★
場內有單車店，即租即玩，適合越區踩單車家庭。
荃灣公園兒童單車徑
對象是 12歲以下小童，設計比其他繽紛，又布滿動物形態裝飾，有上橋、隧道、斜坡等基本設定但冇難度，唔驚小朋友難掌握。
好玩度：★★★
FullMagPC (NGPH06)Sudden View 1.0
沒有留言:
張貼留言